Act 9 | ASO | STEP | Ido' Saulo' Izesu' evenele zuho ngebelelesa lovo gani lo minine' nene hulamo lovo' mino

Acts 9

Saulo' Lulo Do Velepe' Izo Izesu'ni E'metine' Gamazi

(Aposolo' 22:6-16; 26:12-18)

1 Ido' Saulo' Izesu' evenele zuho ngebelelesa lovo gani lo minine' nene hulamo lovo' mino 2 eveneto' medelo mino O'moso inite' lehize-daa' ive naba neida vo ti' lo lo-imine': Izesu' vine' akalo' e'meti viliza venepe ido' vemohope ma ningo ma na'nava ngemo ngele'mizo Zelusalemi numuda gohi alosuve lo luhuvo nite' gizanivo do vo Damasiko ebeta Zuda veti mono' mulise mini'mi monani' nene ngemelesa noluve. 3 Lavo luhuvo gizo emavo akalo' do novo Damasiko ebe' do noalitivo Okulumokuti' labana' ma lite' mate' lo ezela lemo hize vodo vodo o-davo 4 misubolo' lemo pou' lo ongani'. Ongo neivo gamazi ma ti' lo line' giline': Saulo, Saulo, gaza nanitekumu' goboni nomolo-nedane. 5 Ne'mine lavo aza ti' lo longo' ine': Guvekasi ve, gaza zaho nane. Lavo aza lo-emo ti' line': Gaza goboni molo-nedaa' anive naza Izesu' ma ne noluze. 6 Otezo. Numuno ebe' nabala dizo vaanivo inite' ogo molo iline' ne'mi gamazi li-gimilisaze line'. 7 Ido' ezesi maka' vave nene gamazi'vevo' gilaha evene've ne ningami vo'ine vavo gamazi'inesi nomivo ha oti minani'. 8 Ne'mine i nizavo Saulo' aza misuboloti' oto vele pupuso ningine' nene vele lenge lenge lavo inite' ningamine'. Ningamo neivo eze zogo ve zuholite analo' di Damasiko numuda ele'mizi vani'. 9 Ne'mine ikevo a'mida gamene setohamo nene vele ningamiline' ogo liti'musovo' izo minavo noso' nitekisi ido' nososi namo haza minine' ve.

10 Ne'mine ogavo Damasiko numungu' Izesu' gelekele' izipe've ma minine' gulive Anania'. Guvelesi ve a'mine ve'mi velelo' o molo Ananiazo lavo aza Guve'nesi ve, me nouvoni' ve lavo 11 Guvelesi ve'mo gamazi ma ti' lo lo-imine': Gaza oto aka ma gulive pehe ve lo minida nene vo Zuda' numu'veu' dizo Taliso numudoti' ve ma gulive Saulo'ni ne vise' ogo ningezo. Aza nenita lo neive. 12 Ne'mine neivo avazaha inite' velelo' o molavo ningine' nene ve ma gulive Anania' nene Saulo' neida dizo ogo vele gohi ninge lamine' ilive lo ana godololo' nohitivo a'mine ve ningive. 13 Ne'mine lavo Anania' velepe' izo ti' lo lo-imine': Guvekasi ve make, evene' muki' a'mine ve'mi monovo likevo gelekuve. Aza Zelusalemi ebeta geze eveneka zuho ngele'mizo goloso palasa ogo minine' ve. 14 Ido' eveneto' medeli mini O'moso inite' lehizi-daa' ave naba nete gei' guliveka di nizave nene na'nava ngemo ngele'mizo vilive li li-di luhuvo nite' gizi imikevo ogo mela neive. 15 Ne'mine lavo Guvelesi ve ne'mo ti' lo lo-imine': Gaza vozo. A'mine ve ne'mo vo neze monovo'ne evene' zuho ato ato' minanikisi ido' guve'inesi ve naba minanikisi ido' Isilaele' aleve engikisi lo soto' o ngemelive lo nenikumu' gono dalive lo do kegese-dekuve. 16 Ne'mine gono doo nenita gi'mizo neze gulive'ne lo-ngeme ngeme' ilingumu' goboni mili-dikevo mulumo naba geleline' ne'mi monovo elebizelove. 17 Ne'mine lavo Anania' lemo vo numungu' dizo ana godololo' hito ti' lo lo-imine': Saulo, neze zuho make, Guvetesi ve Izesu' nene gaza mela anido' akalo' soto' o gimive ne'mo veka gohi ninge lamine' oganivo O'moso'mi Sikalahu' lemo lukau' mino gono dalive lo nimiselavo nouve. 18 Ti' lo nolo-imivo lite' lo inite' ma lihuvolo gele vine' inite' nene vele gihileloti' do'mozavo ninge lamine' ogo otavo mono' noso holo-dine'. 19 Holo-davo noso' nite' no amuzo dani'.

Damasiko Ebeta Saulo' Mono' Lo-ngimine' Gamazi

Ne'mine ogo Saulo' nene Izesu' evenele zuho Damasiko ebeku' inginesi gamene ngomo ma nomino 20 geto Zuda veliti mono' numu'ningu' dizo Izesu' monovo'vemu' lo-ngemo aza nene mo O'moso'mi gipele ve lo lo soto' o ngimine'. 21 Ti' lo lo-ngemavo line' gamazi gilave muki' gopo ga'ine gili ti' li lani': Ve meve nene Zelusalemi ebeku' a'mine line' gulive laa' ave ngele'mize goloso palasa oga' ive ma nehe Olo. Aza nene mela ogo galapuso ngemo eveneto' medeli mini O'moso inite' lehizi-daa' ave nabala ngele'mizo volosa ani' ma neive. Nadi' ogosa eze monovo've do velepe' izive. 22 Ne'mine li lani'za Saulo' aza gamazi nene amuzo molo lo-ngeme'mo vo Izesu' nene do lu' izelive lo O'moso'mo imiselelesa live ve lo do lamine' ogo lo-ngemavo Damasiko ebeku' minani' Zuda ve ingine a'mido' di velepe' izi li-imilizani' gamazi nomivo gopo ga'ine gili minani'.

Zuda Vete Saulo'ni Bililisa Avo Golise Vine' Gamazi

23 Gamene ha'na gono do do novivo Zuda ve ingine Saulo'ni bililisa li huki 24 numuno ebeli'mi gesi gatedo' igi gohoni niingavo Saulo' aza a'mine gamazi nene gelo lavo 25 eze evenele zuholite holuka' basiketi naba ma di Saulo' a'mingu' lemo minavo basiketilo' nala' izi nalato' di hulika' hulika' igi numuno ebeli'mi lave ha'nalo' Saulo'ni huli-dikevo heta lemo vine'.

Saulo' Zelusalemi Ebeku' Vo Minine' Gamazi

26 Saulo' lemo vo Zelusalemi ebeta heteline'. Hetelo Izesu' evenele zuhou' vo gi'mizelove lo engita gi'mizelesa ine'za ingine Izesu' izipahala lolo' uve line' nene soza lihe li ezemu' ngehelele izine'. 27 nGehelele izavo Banabasi' ne'mo Saulo'ni do gi'mizo aposolo nizada ele'mizo vo Saulo' Guvelesi ve akalo' ningine' gamazi ido' Damasiko numuda Izesu' monovo danava lovo' kisilevo' ogo lo-ngimine' gamazi nene Banabasi' vetete' ogo lo-ngemavo 28 inginesi Zelusalemi ebeta mino dizo lemo ogo mino Saulo' aza ehelele izamivo Izesu' monovo danava've lovo' kiselevo' ogo lo-ngemaa' ine'. 29 Ne'mine ogo Zuda ve linge ma nGiliki gamazi laa' ani' aleve inginesi lo-ngemavo mono' gamazi li volelo' melo' igi gamazi'ine'mo lovo'ningu' ogavo bili hililiza akamu' vise' ani'. 30 Ti' ikevo Izesu' evenele zuho gili Saulo'ni Kaesalea ebeta ele'mizi vi huli-dikevo vo Taliso ebeta heteline'.

31 Ne'mine ogavo noso hilave Zudaia misubou' ido' nGalilaia misubou' ido' Samalia misubou' minave engita hongu soto' ine'. Soto' ogavo hongu li mini O'moso'mo amuzo ngemavo O'moso'mi gamazi gili di nizavo O'moso'mi Sikalahuli'mo hize ele' o-ngedavo mulise'ine naba ine'.

Petolo' Ainea'ni Do Lamine' O-davo Oto Vine' Gamazi

32 Petolo' aza Izesu' evenele zuho ninge-ngedelesa mone mone o'mo vo Lida ebeta nizadasi lemo vo heteline'. 33 Hetelo a'mida ve ma gulive Ainea'ni ne ningine'. Aza ve gebili mino holomolo' ongo neivo kilisimasi eiti (8) ogo vine'. 34 Ningo Petolo' aza ti' lo lo-imine': Aineazo, Izesu' Kilisito' do lamine' o-gedaze. Oto aviliseka gango molozo. Ne'mine lavo lite' lo a'mido' otine'. 35 Otavo Lida aleve ido' Saloni alevesi ningi lu'ine di velepe' izi Guvelesi vela vi gi'mizani' ve.

Tabita' Hilinguti' Petolo' Do Ote-dine' Gamazi

36 Ne'mine ikevo Zopa ebetati' Izesu' evenele zuhouti' vene' ma minine' gulive Tabita'. nGiliki gamaziuti' a'mine Tabita' gulive nene Toloka' ve laa' nave. Aza nene evene' hize ele' o-ngedaa' monovo lamine' mangi o-ngedaa' ine' vene' minine'. 37 Ne'mine oga' ine'za a'mine gamenelo' nene inite' gize do hiline'. Helavo gonoso nene noso' izi numuno mulolo' lumu gohi ma miningu' di dizi ingi-mikani'. 38 Lida ebe' nene Zopa ebe' gahevela avita neivo Izesu' evenele zuho ingine Petolo' nela neive lani' nene gili evene' sita' ma ti' li ngimiselikevo ezelo' vasine'. Vi ee, ane'nazo li ti' li li-imasine': Gaza geto otanivo leli' ebetela volone lo nosive. 39 Likesivo Petolo' gelo otavo engikisi vani'. Vi Petololesi hetelikevo gonoso ingi-mikangu' ele'mizi dizani'. Dizo ningine' nene vene' geto' natokovo' di mulise mili ive nama igi Toloka' velesi mino vene' kolosu ato atoli'mine ongote-ngidine' nene Petolo'ni elebizi osu' lani' ve. 40 Ti' ikevo Petolo' nene evene' muki' ngimisele hulo heta ogo alabuvolo hizo O'mosola line'. O'moso opo'ni lo osu' lo velepe' izo gonoso nene ti' lo lo-imine': Tabita, otezo. Lavo vele pupuso Petolo'ni ningo oto mito' minine'. 41 Neivo Petolo' analo' doo do ote-dine'. Ne'mine ogavo Petolo' aza vene' gevonokisi ido' Izesu' evenele zuho lingesi asi lo-ngedavo ikevo Tabita nene gohi vele gizo ha neivo engi' a'ningu' molani'. 42 Ne'mine ogavo ne'mi guvele Zopa misubou' buu lo vavo evene' Guvelesi vemu' gili ele'vole' ani'. 43 Ne'mine ikevo Petolo' nene ve ma gulive Simoni' aza ize losuvo do lamine tamine' oga' ive ei' numungu' maka' Zopa ebeku' gamene ha'na minine'.